Cuento. La zorra y el lobo

Estu era una vez la zorra y el lobu, y tenín mucha hambre. Y venga andá, y venga andá, y vía nada pa comé. Fuerun y venga andá hasta que ya vierun un granja. Y la zorra, cumu se las da de lista, fue y le diju a su compadre el lobu:

- mira, me huele que en esa granja hay gallinas. Pos yo voy a entrá, que no, comu soy más chica me cuelu por cualquier bujeru. Y tú, te vas pal monte y te van haciendu una cueva, que sea bien jonda, pa meté a las gallinas que cojamus, ¿eh?, ¡que no se te olvidi!

Fue la zorra y llegó a la granja, y fue y se metió por un bujeru que había. Y estaban allí toas las gallinas y los nialis con los huevos. Y el lobu, venga a trabajá, venga a trabajá, ¡se metía unas tupas a trabajá!. Estaba en el monti, jaciendo la cueva pa meté a las gallinas y los pollus, ¡una cueva bien jonda!

Y ahora vio la zorra los güevitus, ¡con lo que a mí me gustan!

Las zorras, como son muy golosas, pus ¡hala!, a comersi los güevitus.

Se los empezó a comer, venga a comérselos, hasta que no dejó ni unu. Ahora, ya vieni el lobu, y venía rendíu de tanto trabajá. Y dici: “A vé, dónde están las gallinas”

Dice la zorra: “Ahí las tengua todas, atás por las patas, pa que no se escapin”. Las tenía debaju de una banasta. Dici el lobu: “¡Ah, por mu bien!, ya veo que has hechu tu trabajitu. Muy bien, muy bien. Yo también he hechu el mío; ya tengo aprepará la cueva. ¡Menuda cueva he preparau!

Ahora, ya iban a cogé las gallinas cuando ¡pum!, se abre la puerta del corral, y el amu que se presenta allí, el grajeru. Y traía una jorca de hierru en la manu. Y dici: “¿Qué haceís vosotrus aquí?”.

Dice la zorra: “Nada, miri usté. Es que está el tiempu mu friu y nos hemus arrimau aquí, pa no pasá friu.

Mira el hombre pal nial, ande los huevus, y vio que no había ni uno.

Va y dici: “¿Quien se ha comiu los huevus?.

No había arreparau entoavía en las gallinas. Y dici: “A vé, ¿quien se ha comíu los huevos? Aquel que tenga la voz fina es el que se ha comíu los güevus”.

Le dice al lobu: “ A vé, habla tú”.

Y hace el lobu: “Auuu, auuu, auuu”.

Dici entoncis el granjeru: “Tú no has siu, tú tiene la voz muy ronca”.

Le dici a la zorra: “A vé, ahora te toca a tí”.

Fue la zorra y dici: “Guai, guai, guai”.

Dici el hombre: ¡Tú has síu, tú has síu, que se te nota por la voz.

Y fue, y le pinchó con la jorca en el culu. Salió la zorra corriendu que no veía campo, con la jorca clavá en el culu. Y desde entonces, dicin que las zorras tienin la voz tan fina por la culpa de güevus que se metió en el gallinero.

 

Nieves SanNazario (Ladrillar). EN: El Correo jurdano, n. 17, (jun. 1999), p. 15.