Cuento. La Virgen de plata

Esti que iba vé dos hermanus que eran carpinterus, los pobris eras carpinterus pobris. Y pusu unu un letreru en la puerta que decía:

-El dineru to lo alcanza”-

Y esto, que pasó por allí el Rey, y lo vio y lo leyó. Y fue y se metió ande ellos, y fue y le diju:

- ¿Quien ha puestu esi letreru?-

Y dici uno de ellus:

- Pues un servidó lo ha puestu.

- Y poni usté que el dineru tó lo alcanza…-

- Sí seño, es verdá. El dineru tó lo alcanza-

Y dici el Rey: “Pues yo digu que no, y si no, vamus a apostá”.

Y dici el carpinteru: “Pos apostemus lo que sea”.

Dici el Rey: “Pues yo apuestu que usté no es capá de vá a mi hija en dos añus. Y si esté es capá de verla, me mata usté a mí; y si no, yo le mato a usté”.

-Pues esu está hecho-

Se fue el Rey y le dice el otru hermano: “¿Pero qué te has apostau tú con el Rey? ¿Pues no sabis lo que has jechu?

- Ya, claro, el Rey encerró a su hija bien encerrá pa que no la puediera ver el carpinteru en dos añus-

Y el carpinteru se he a echá, y venga a dar vueltas, venga a dar vueltas, na más hacía que rebacá. Y se levanta por la mañana y le dici al hermanu: “Tranquilu, que ya está to resueltu. Mirá, ahora vamo a hacé una virgin, una virgin a la midía mía pa que coja dentru. Y la hacemus, como carpinterus que semus, de madera, y la revestimus de plata, una virgin revestía de plata, bien revistía”.

Se pusun; jidun la virgin y esu, y el día que acabarun de hacé le dici: “Mira, te va a ir a venderla. Yo voy metíu dentru, pero no se la vendas a nadie a no ser al Rey. Se la tienes que vendé al Rey”.

Entoncis, ya la hizu y se metió dentru. Cogieron y la metierun en un carry y ¡hala!, se fueron a venderla. Y al llegá a la puerta del Rey, la hija del Rey estaba metía en la habitación, en una habitación que tenía unus cristalis que se vía todu lo que pasaba por la calli, pero desdi la calli no se veía nada de lo que pasaba en dentru. Y ella vio la Virgin y los mandó llamá, bueno, mandó a un criau que llamara al hombri del carru, que ella no podía salí de la habitación. Fue el criau y llamo al Rey. Vinu el Rey y le dici ella: “Papá, yo quisiera esa Virgin, pa que la tenga aquí y me entretenga en rezali el rosariu y esu; yo quieru esa Virgen de plata”.

Pues, yo, fue el Rey y sí, se la compró. Le compra la Virgin, la ajustarun, se la colocan en la habitación, y ya los otrus se fuerun para la su casa. Y ya la hija del Rey se le ponía a rezali el rosariu y empezaba: “Dios te salve, María, llena eres de gracia, el Señó es contigu, bentita tú eres… y tunturú tunturú…, y así hasta que acababa la salvi. Saltaba la Virgin: “Santa María, madre de Dios, ruega por nosotros…” Y asín una y otra vez.

Y dice ya: ¡Pero qué coño es estu! Entoncis se abrió la Virgin, y entoncis salió de allí, y se quedó ella asustá del tó. Le dici él: “No te asustis, que estu es una apuesta que hemus hechu con tu padri, que yo no te tenía que vá a tí en dos añues, entoncis tenía que matá a tu padri…

Dici ella: “Por esu me tenía a mí mi padre tan bien guardá, que no me dejaba salí para calli, y yo todu lo vía por los cristalis pero a mí no ve vía nadie”.

Dici él: “A vé ahora, a vé qué hecemus”.

Y va ella: “Siendu así cumu a sío, ¡pos qué vamus a hacé!, pidiré ración dobli y nos estaremos aquí los dos.

Ahora ya, estuvun allí, y pasaba el tiempu, tuvun una niña, y ya la niña era grandi, y ya se le iba a cumplí el tiempu, y ya dicin: “Hay que procurá de sacá a la niña ante de que descubran lo que ha pasau; hay que procurá de sacarla”.

Cogieron la niña, la sacarun al jardín, y le dicin a la niña: “Mira, si te preguntan quien eris tú le dicis Mi abuelo es el Rey, mi mamá la Infanta y yo nací de Nuestra Señora de Plata.

Sali por allí, por el jardín, pa’cá y pa’llá, cuando la ve una señora y dice: ¿Pos y esa niña, de quien es? Mirala qué guapa es, qué bonita, qué bien vestía va. ¡Oye, niña!, ¿tú de quien eris?”.

Va, y ella dici: Mi abuelu es el Rey, mi mamá la Infanta, y yo nací de Nuestra Señora de Plata”.

Y dici:¡Pos esta niña!

Llaman al Rey, va y le pregunta: ¿De quien eris, niña?

Y ella: Mi abuelu es el Rey, mi mamá la Infanta, y yo nací de Nuestra Señora de Plata.

Dici el Rey: ¡Ya lo veremus!

Se fue el Rey de enseguida donde ella, y estando allí los dos, el Rey se desmayó.

Lo cogió él y le dici: “No te va a pasá nada, levanti usté. Sólo es pa que vea que yo he alcanzu a vé a su hija. Y ya, comu soy el yernu suyu, por no hay nada de lo apostau. ¡Y pos comu quieri que yo mati a mi suegru!

Y de aquí, que el dineru to lo alcanza, pues con el dinero había comprau la Virgin de Plata y, en comprándola, había comprau lo que iba en dentru, al carpinteru pobri, y fue así cumula hija del Rey se casó con un pobri, y bien dici el refrán que “poderosu caballeru es don dineru”.

 

Faustino Domínguez Sánchez (Ribera Oveja). EN: El Correo jurdano, n. 15, (dic. 1998Ç), p. 14. y n. 16, (abr. 1999), p-20-21.