Cuento. El charco de la serpiente

Pos se cuenta que río Jurde arriba, pa’llá arriba, había un charcu temerosu. Dicin que allí vivía una serpienti de agua. La vida de entoncis, claro, pos la genti con su ganaitu, con las cabras, vélai… Tos estus pueblus han siu pueblus de pastoris. Tenían que dí pa’llá arriba, pa’l charco de la serpiente, que pa’llí había buen pastu pa que comiera el ganau. Dicin que la serpiente era la que mandaba allí, y tos tenían que obedecé.

Un día fue y le diju a los pastoris: “mirá, pastores, hast ahora vos he permitíuque andéis con el ganau por estas propiedades mías, pero a partí de hoy me tenéis que traé cada unu una cuerna de lechi, y aquel que no me la traiga ya se puedi día preparandu, que le agañotu la vida, a él y a sus cabras.

Todos los días le levaban ya a la serpienti una cuerna de lechi, y asín tos los días. Un día, lo arrejuntó a tós los pastoris la serpienti, y dicin que les diju: “Mañana, va a vé un deleuviu que nunca se vio otru igual, de modu y manera que ya vos encargaréis de arrecogé el ganado, pa que no se vos ajogui, que ya vos digu que es un deluviu que nunca se vio otro igual”.

Va la serpienti, y cumu era adivina, pus les diju esu, lo de la tormente, de aquel deluvio a diba a vení. Peru los pastoris se lo tomarun a broma y malditu el casu que hizun. Sólo fue unu, un pastó, el que no sacó las cabras aquel día. Es que estí era el cabreru listu, y fue y no sacó las cabras.

Se preparó un deliviu de diba de mar a monti. Se llevó por delanti a toas las cabras y a tos los cabrerus, no queó ningunu. Sólo se salvó el cabreru listu, que no había sacay el ganao. Y por la cuenta, la serpiente se metió pa un tallerón, y salieron entoncis los manantíus del río Jurde, y así dicin que se fundó el río.

Genara Martín (Casarrubia). EN: El Correo jurdano, n. 18, (dic. 1999), p. 17.